ગુજરાતી ગઝલસંપદા/ મકરંદ મુસળે

મકરંદ મુસળે

આમ આવ્યો હતો, તેમ ચાલ્યો ગયો,
કોઈ જાણે નહીં, કેમ ચાલ્યો ગયો?

શ્વાસનું એક પીત્યું હતું ઓશીકે,
મૂકીને જેમનું તેમ, ચાલ્યો ગયો.

કંઈ જ લાવ્યો નહીં, કંઈ જ લીધું નહીં,
જેમ આવ્યો હતો, એમ ચાલ્યો ગયો.

જે અનુત્તર રહ્યા; ને અનુત્તર ગયા,
એ બધા પ્રશ્નની જેમ ચાલ્યો ગયો.

ક્યાં કશું છે નવું? કેમ સૌ સ્તબ્ધ છો?
જેમ સૌ જાય છે એમ ચાલ્યો ગયો.

સ્વર્ગની મહેફિલો મનભરી માણવા,
હા ગઝલનો એ હાકેમ ચાલ્યો ગયો.