નયન હ. દેસાઈની કાવ્યસંપદા/મુંબઈ ઇલાકાનો માણસ ગઝલ

મુંબઈ ઇલાકાનો માણસ

રસ્તાઓ ચીતરીને ઠોકર બનાવે છે મુંબઈ ઇલાકાનો એક માણસ,
પડછાયા વીણીને પાદર સજાવે છે મુંબઈ ઇલાકાનો એક માણસ.

ભીંતોના જખ્મોને ઢઆંકી કૅલેન્ડરથી તારીખમાં વર્ષો ડુબાડે છે,
અથવા ઘર વેચીને દીકરી પરણાવે છે મુંબઈ ઇલાકાનો એક માણસ.

પાણીથી સાંધે છે તૂટેલી નદીઓ ને ખોબામાં ધગધગતી રેતી છે,
પોતાના કિનારે ખુદને જલાવે છે મુંબઈ ઇલાકાનો એક માણસ.

કેલેન્ડર આપો તો ભીંચ માગી બેસે છે ઊભી તિરાડે એ જીવનારો,
તૂટેલા ઉમ્બરનું વાસ્તુ કરાવે છે મુંબઈ ઇલાકાનો એક માણસ.

ગ્રહયોગો કારણ છે, સાંધેલાં સગપણ છે, માની પથારીએ ઘડપણ છે,
કૂંડળી કઢાવીને મનને મનાવે છે મુંબઈ ઇલાકાનો એક માણસ.