અર્વાચીન ગુજરાતી કાવ્યસંપદા/મીરાં જોશી/સાંજ

{{Heading| સાંજ |મીરાં જોશી}

હવે સૂરજ આથમે છે બસ,
સાંજ પડતી નથી…
સાંજને ગળી જાય છે,
ઘર તરફ જતાં વાહનોનો ધુમાડો…
ઓવરટાઇમના કલાકો…
ભાવની રકઝકમાં અટવાતાં બજારો…
હવે સાંજ,
બાલ્કનીમાં આવીને બેસતી નથી…
હીંચકો ઝૂલ્યા કરે છે મંદ પવને, એકલો એકલો…
હવે ઘરની પાળી ઉપર,
પંખીઓના ટહુકા આવીને બેસતા નથી.
હવે આકાશે
સૂર્યાસ્તની રંગોળી ઊંચાં મકાનોની
આરપાર ખોવાઈ જાય છે…
હવે,
બપોર અને રાત વચ્ચે સાંજની ઘટનાનો
એક આભાસ માત્ર થાય છે…
હવે માત્ર સૂરજ આથમે છે બસ…
સાંજ પડતી નથી…

(પદ્ય, જુલાઈ–સપ્ટેમ્બર ૨૦૨૦, પૃ. ૨૦)