બાળ કાવ્ય સંપદા/ચાલો, સાગરપારે!

ચાલો, સાગરપારે!

લેખક : મકરન્દ દવે
(1922-2005)

મોરમુખી ઓ નાવડી મારી ચાલો, સાગરપાર રે!

નીલમ નીલાં નાચતાં પાણી,
નાચતું મારું મન સ્હેલાણી,
ભોમકા મીઠી આજ અજાણી,

નોતરે પેલા ઊગતા સૂરજને સથવારે,
મોરમુખી ઓ નાવડી મારી ચાલો, સાગરપારે!

સાત સાગરને સામટા ખેડી,
રંગરંગીલા સોણલાં તેડી,
પાડશું પ્રથમ પ્રેમની કેડી,

દરિયા કેરી દુનિયાના જ્યાં સોબતી નેહ નિતારે,
મોરમુખી ઓ નાવડી મારી ચાલો, સાગરપારે!

ભેટ ભરીને વંકડા વેષે,
આવશું પાછાં આપણે દેશે,
બા ને બેની દુખણાં લેશે,

શ્વેત સઢાળી નાવ ઓ ચાલો, ચાલો એક ઇશારે,
મોરમુખી ઓ નાવડી મારી ચાલો, સાગર પારે!