બરફનાં પંખી/રીસાઈ જતી છોકરીનું ગીત
રીસાઈ જતી છોકરીનું ગીત
આખ્ખુંચે ગામ ભલે મેળામાં જાય હું તો
એકલી રહીશ મારા ખેતરે
આઠમના મેળામાં ફરતા ચગડોળ સમા
માણસની ભીડ મને છેતરે
મેળે જનાર લોક આપતા શિખામણ કે
“સાચવજે ખેતર, નૈ ખોતી!”
બાજરાનો સાવ ઝીણો દાણો હું હોઉં
એમ ચકલીની આંખ મને જોતી
ખેતર લૂંટાવ્યાના છેતરતા સુખ સમી
એકલતા વ્હાલીછમ લાગશે
મેળો વિખરાઈ જતાં માણસનું દેખાવું
પથ્થરની જેમ મને વાગશે
આખ્ખુંચે ગામ ભલે મેળામાં જાય હું તો
એકલી રહીશ મારા ખેતરે
***