કાવ્ય-આચમન શ્રેણી – લાભશંકર ઠાકર/૫૧.ત્રણ લઘુકાવ્યો (શબ્દ, શું થશે, ‘ભાષા’માંથી)

૫૧.ત્રણ લઘુકાવ્યો (શબ્દ, શું થશે, ‘ભાષા’માંથી)

લાભશંકર ઠાકર

શબ્દ
શબ્દ
વિશેષણથી ચાદર ઓઢીને ઊંઘી ગયો છે ઘસઘસાટ.
જગાડું એને ?

(`બૂમ કાગળમાં કોરા’માંથી)

શું થશે ?

તાત્ત્વિક કટોકટીમાં
મારું ક્રિયાપદ ફસાઈ ગયું છે.
શું થશે ?

(`બૂમ કાગળમાં કોરા’માંથી)

`ભાષા’માંથી

ખંડ : ૮૨ (કાવ્યપુરુષ પકડે છે)

કાવ્યપુરુષ
પંખીના પડછાયા
પકડે છે
નાખી
ભાષાજાળ.
ખંડ : ૮૪ (ભાષા તાકે)

ભાષા
પોતાના પ્રતિબિંબને
ભાષામાં
તિરંદાજ થઈ
તાકે.
(`હથિયાર વગરનો ઘા’માંથી)