રમણીક સોમેશ્વરની કવિતા/ટેબલ (૨)

૫૪ . ટેબલ (૨)

૧
જે લાકડામાંથી
પારણું બન્યું ભાષાનું
એ જ લાકડામાંથી
બન્યું
મારું ટેબલ
એની ઉપર
આકાશ પાથરી
હું
રમ્યા કરું છું
વાદળ વાદળ

૨
બરફ જેવા
થીજેલા અક્ષર
ઓગળવા લાગ્યા
ટેબલની આંચે
અને
કાગળ
વહેળો બની ગયો

૩
કાળામાંથી
પારજાંબલી બનતો
સક્કરખોરો
ઊડ્યો
સોનાલીની ડાળેથી
અને
ઘેરી લીધું
મારા ટેબલને

૪
સાંજ પડે ને
આથમણી બારીએથી
છવાઇ જાય ટેબલ પર
ઉદાસ ધૂન
એના સૂરમાં સૂર મેળવી
ગણગણ્યા કરે ટેબલ
નવાં નવાં ગીત
એ લયમાં લસરતો
સૂરજ
સરી જાય ખીણમાં
ખીણના અંધારાને
ઘસી ઘસીને
પેટાવે ટેબલ
ફરી
એક તાજો સૂરજ