સોરઠી સંતવાણી/સંસ્કાર જોવા

સંસ્કાર જોવા

દળી દળીને ઢાંકણીમાં ઉઘરાવવું ને
એવું કરવું નહીં કામ રે,
આપણી વસ્તુ ન જાય અવરથા ને એ
જવાનું લેવું નહીં નામ રે —
ભાઈ રે સેવા કરવી તો છેલ્લા જનમવાળાની ને
ભજનમાં જોવા સંસ્કાર રે,
જો પુરવનું પુરુષારથ હોય એહનું ને
તો મેળવવો વાતનો એકતાર રે. — દળી દળીને.
ભાઈ રે વિષયવાળાને આ વાત ન કહેવી ને
એથી રાખવું અલોપ રે,
દેખાદેખીએ મરને કંઠી બંધાવે ને
શુદ્ધ રંગનો ચડે ન ઓપ રે. — દળી દળીને.
ભાઈ રે ઉત્તમ કર્મ જો કરે ફળની આશાએ ને
એવાને ન લાગે હરિનો લેશ રે,
ગંગાસતી એમ બોલિયાં ને
એઓ ક્યાંથી ભાળે અખંડ દેશ રે. — દળી દળીને.

[ગંગાસતી]