કાવ્ય-આચમન શ્રેણી – જયન્ત પાઠક/૪૭. પાવાગઢમાં
૪૭. પાવાગઢમા
જયન્ત પાઠક
ચાલો જરાક ફરીએ તડકાળ કેડીઓમાં
આ પ્હાડની પુરાણી ખડકાળ કેડીઓમાં.
વૃક્ષોને પાન... ના, ના, છે પંખીઓ જ ફૂટ્યાં!
થોડું ટહેલી લઈએ ટહુકાળ કેડીઓમાં.
સ્તન જેવી ટેકરીઓ વચ્ચે છુપાતી ચાલે
ચાલો શીળી હૂંફાળી શરમાળ કેડીઓમાં.
ભાંગેલ મૂર્તિઓ ને તૂટેલ કોટ-કિલ્લા
શો રાંક થૈ પડ્યો છે આ કાળ કેડીઓમાં!
ટોચે પહોંચી પાછા સંભાળજો ઊતરતાં
સીધો ખીણો ભણીનો છે ઢાળ કેડીઓમાં.
૨-૧-૧૯૮૭
(ક્ષણોમાં જીવું છું, પૃ. ૪૪૦)