દલપતરામનાં શ્રેષ્ઠ કાવ્યો/૬૪. કંકોતરી લખતી વખતે ગાવાનું ગીત–પહેલું
સાતસેં સાંઢણિયો શણગારોરે, નીરો તેને નાગરવેલનો ચારો રે;
કાગળ કંકોતરીના લખાવો રે, સોનેરી વરખથી તે શોભાવો રે.
સ્નેહી સગાંને તેડવા કાજ રે, એક એક સાંઢણિ મોકલો આજ રે;
પ્હેલી તો સાંઢણિ પાટણ જાય રે, બેન ગંગાબેન તેડાં કરાય રે.
બેની તો પગરણમાં પ્હેલાં જોઈએ રે, બેનીનું કામ ન સરે બીજા કોઈએ રે.
બીજી તો મોકલો મુંબઈ ગામ રે, ફઈબા જમનાબાને તેડાવા કામ રે.
ત્રીજી સાંઢણલી કરી તૈયાર રે, મોકલો મથુરાં નગર મોઝાર રે;
કાકા કમળસેનને તેડી આવે રે, કાકા આવીને કુટુંબ શોભાવે રે.
ચોથી સાંઢણલી ચતુર સુજાણ રે, મોકલો સૂરત શહેર પ્રમાણ રે;
મામા નહારસિંહજી ત્યાં સોહાવે રે, મામો મોસાળ લઈને આવેરે.
પાંચમી સાંઢણલી પચરંગી રે, જાય ઉદેપુરમાં તે ઉમંગી રે;
માસી મોંઘીબેન તેડવા માટે રે, વેગેથી મોકલો વેગળી વાટે રે.
સકુટુંબ સહુને તેડી આવેરે, સહુ આવી માંડવરો શોભાવે રે;
યાદ લખો બેસી આ ઠામ રે, સ્નેહી સગાનું ન ભૂલશો નામ રે.
સ્નેહથી સર્વેને તેડાવો રે, આજ આવ્યો ઉત્તમ અવસર આવો રે;
ગોર ગોરાણી તેડાવો ઠામ રે, દ્વિજવર જોશે દલપતરામ રે.