મંગલમ્/કોણ રોકે!
કોણ રોકે!
આ પૂનમની ચમકે ચાંદની, એને કોણ રોકે?
કાંઈ સાયર છલક્યો જાય, કે એને કોણ ટોકે!
આ અષાઢી વરસે મેહુલો, એને કોણ રોકે?
કાંઈ પૃથ્વી પુલકિત થાય, કે એને કોણ ટોકે!
આ વસન્તે ખીલતાં ફૂલડાં! એને કોણ રોકે?
કાંઈ ભમરા ગમ વિણ ગાય, કે એને કોણ ટોકે!
આ આંબે મ્હોરી મંજરી, એને કોણ રોકે?
કાંઈ કોકિલ ઘેલો થાય, કે એને કોણ ટોકે!
આ અંગે યૌવન પાંગરે, એને કોણ રોકે?
કાંઈ ઉરમાં ઉર નહિ માય! કે એને કોણ ટોકે!
— સ્નેહરશ્મિ