યાત્રા/જોયો તામિલ દેશ: Difference between revisions

{{Heading|જોયો તામિલ દેશ|}}

જોયો તામિલ દેશ, વેશ અડવો, શ્યામાંગ જાણે બળ્યો

દાઝ્યો ભાખર, નિત્યતપ્ત ધરતી આ તામ્રવર્ણી પરે

ત્યારે ફેરવવું ચુક્યો, તદપિ ના એ અંતરેથી ટળ્યો.

ના ના અંતરથી ટળ્યો, ઉર ઠર્યો એને વધુ તપ્ત એ

ભૂમિને હૃદયે સુફીત જલનો શીળો સુનીલાંચલ

ને એ પ્રતીમસ્પર્શથી ધરણીને રોમાંચ, શો દૃપ્ત તે!

કેવી દૃપ્ત સુતૃપ્ત ભૂમિ રમણી આ નાથ-આશ્લેષથી;

રોમાંચે પુલક્યું સદા ઉર ઝૂલે આ વૃક્ષરાજી બની,

પૃથ્વીને પટ નર્તતી પ્રકૃતિની કો દિવ્ય આશિષથી!

જોયો તામિલ દેશ, લેશ હરખ્યું ના સદ્ય મારું ઉર,

આવી ઉન્મદ રૂપની ધરતીનાં કાં દીન આવાં શિશુ —

ના વર્ષા ભરપૂર નીર નહિ વા રેલંત કોઈ પૂર.

રે આ તામિલ દેશ, ઠેસ દઈને લક્ષ્મી શું ચાલી ગઈ,

ઊંચાં ઉત્તર હૈમ હર્મ્ય વસવા? ના ચૌલ કે પાંડ્ય કો

જામ્યુંઃ છો ઊતર્યા બપોર, પણ રે સંધ્યાની લાલી ય ગૈ?

તોયે શ્યામલ રાતમાં જન-ઉરે ઝંખા નહીં લુપ્ત થૈ,

શ્રીની, શ્રીપતિની, પ્રબોધ-રસની, સૌન્દર્યની, જ્ઞાનની

તારા-ભૂષણથી વિભૂષિત બની, આહ્‌લાદિકા મત્ત થૈ.

જોયો તામિલ દેશ બેસી ઘરમાં કે માર્ગમાં ખેતરે,

જોયાં પ્રાંગણ સ્વસ્તિકે સુહવતાં માંગલ્ય નિત્યે ધરી,

જોયાં ગોપુર વ્યોમમાં સ્થિર ખડાં ભક્તિ શું ભક્તાંતરે!

જોયો તામિલ દેશ, કેશ રમણી ગૂંથંતી શી કોડથી,

શ્યામાંગે રસતી હરિદ્રુતિને, એકાદ યે પુષ્પથી

ઓષ્ઠે તામ્બુલ રાગ, કર્ણ ધરતી શા હીરકો લાડથી!

જોયો તામિલ દેશ, શ્રેષ્ઠી-કરમાં કલ્લી લસે સ્વર્ણની,

શીર્ષે લંબ શિખા, ત્રિપુંડ તિલકોનાં રમ્ય આલેખને

સાદો સ્વચ્છ યુવાન સૌમ્ય વસને કો મૂર્તિ લાવણ્યની.

જોયો તામિલ દેશ, બેશ બમણો લાગ્યો અજાણ્યાપણે?

કે કો મોહક મૂર્છને, રમણીના કો સ્નેહના કર્ષણે

ના ના, સાવ તટસ્થ, સાવ નિકટે પ્હોંચી લહ્યું મન્મને.

જોયો તામિલ દેશ, મેશ મનની કે દેહની જે રહી

બીજે તે ત્યહીં યે હતી, તદપિ એ ઉત્કૃષ્ટ કૈં લક્ષણે

ભક્તિની રસની કલારુચિ તણી ના કો કમી ત્યાં લહી.

જોયાં શ્યામલ એ મુખો સ્મિત થકી એવાં જ ર્‌હેતાં ખિલી,

જોઈ શ્યામલ જોબના મદભરી એવી જ લજ્જાભરી,

જોયો જીવનનો કલાપ અહિં યે અન્યત્ર જેવો બલી.

ને જોયું ત્યહીં એક કૌતુક નવું અન્યત્ર ક્યાંયે ન જે,

ના કો કાવ્ય-કલા-રસે, મનુજના કો કર્મક્ષેત્રે ન જે,

ના ધર્મે, ન શહાદતે, નહિ વસ્યું વા રાજછત્રે ય જે!

ના ગાઢ પ્રણયે — કિંતુ કથની તેની સમે કો બીજે!

<br>

{{HeaderNav2