અર્વાચીન ગુજરાતી કાવ્યસંપદા/નયના જાની/પ્રતીક્ષા જ છે હવે
Revision as of 05:10, 21 July 2021 by MeghaBhavsar (talk | contribs) (Created page with "{{SetTitle}} {{Heading|પ્રતીક્ષા જ છે હવે|નયના જાની}} <poem> ::::::::::::વ્યાકુળ હૃદયનું કામ...")
પ્રતીક્ષા જ છે હવે
નયના જાની
વ્યાકુળ હૃદયનું કામ પ્રતીક્ષા જ છે હવે,
મારગ અને મુકામ પ્રતીક્ષા જ છે હવે!
રાત્રીદિવસ ને માસવરસ, શું છે આ બધું?
પ્રત્યેક પળનું નામ પ્રતીક્ષા જ છે હવે!
કોઈના આગમનની અપેક્ષાની વેલ પર,
— પર્ણો ખર્યાં તમામ – પ્રતીક્ષા જ છે હવે!
એકદંડિયા મહેલની બારીયે બંધ છે,
આરંભ ને અંજામ પ્રતીક્ષા જ છે હવે!
છેલ્લે પગથિયે વ્યર્થ એ છાયાને શોધ ના,
નિઃસ્તબ્ધ જળને કામ પ્રતીક્ષા જ છે હવે!
એકાદ મધ્યરાત્રીએ જે ઝળહળી ગયું,
એ તેજનું ઇનામ પ્રતીક્ષા જ છે હવે!
પડઘાય અશ્વ ક્યાંક, અહીં ધૂળ ઊડતી,
આ ઝાંઝવાને ગામ પ્રતીક્ષા જ છે હવે!
(ગુજરાતી પ્રતિનિધિ ગઝલો, પૃ. ૫૭)