કાવ્ય-આચમન શ્રેણી – જયન્ત પાઠક/૩૮. અઘરું નચિકેત થવાનું

૩૮. અઘરું નચિકેત થવાનું

જયન્ત પાઠક

આમ
ઉંબર સુધી આવીને પાછા ફરવાનું!
ગમતું તો નથી; પણ શું થાય?
સજ્જડ ઝાલ્યો મને
આ વેલીએ, આ હરણાએ
આ તરણાએ, આ ઝરણાએ
જીવનાશ્રમની સકલ વ્હાલપે, કરુણાએ
ખેંચી રાખ્યો સખત મને પાછળથી.
કોઈ બોલ્યું નહિ વિદાયવચનો — આશીર્વાદ;
અરે તિરસ્કારનો એક બોલ
એક હડસેલોય પૂરતો થાત.

હવે
આમ ઉંબર સુધી આવીને પાછા ફરવાનું!
ખરેખર, કેટલું અઘરું છે નચિકેતા થવાનું!

૨-૨-૧૯૮૫

(ક્ષણોમાં જીવું છું, પૃ. ૩૫૭-૩૫૮)