સોરઠી સંતવાણી/અગમ અજર રસપાત્ર

અગમ અજર રસપાત્ર

વીણવો હોય તો રસ વીણી લેજો, પાનબાઈ!
હવે આવ્યો બરાબર વખત,
ઊભાં રે થાવ પાનબાઈ! શૂરવીરપણું રાખો,
હવે લાંબો નથી કાંઈ પંથ —
ભાઈ રે! આ રસપાત્ર, પાનબાઈ, અગમ અપાર છે,
કોઈને કહ્યો નવ જાય,
એ રસ હું તમને બતાવું, પાનબાઈ!
મારી પૂરણ થઈ છે દયાય. — વીણવો.
ભાઈ રે! —  આ અજર રસ કોઈથી જરે નહીં, પાનબાઈ!
અધૂરાને આપ્યે ઢોળાઈ જાય,
પીઓને પિયાલો પ્રેમ કરી, પાનબાઈ!
ત્યારે લેરમાં લેર સમાય. — વીણવો.
ભાઈ રે! આપ્યો રસ ને ખોળામાં બેસાડ્યાં,
મૂક્યો રે મસ્તક ઉપર હાથ,
ગંગા રે સતી એમ બોલિયાં રે
ત્યાં તો નિરખ્યા ત્રિભુવનનાથ. — વીણવો.