કાવ્ય-આચમન શ્રેણી – હરીન્દ્ર દવે/૧૨. તમે થોડું ઘણું

</poem>

૧૨. તમે થોડું ઘણું

         તમે થોડુંઘણું સમજો તો સારું
કે રાજ, વ્હેતા વાયરાને કેમ કરી વારું?
ધારી ધારીને તમે બોલ્યા બે વૅણ
                  એની અણધારી ચોટ ઉરે લાગી;
જેનાં શમણાંમાં મીઠી નીંદર માણી’તી
                  એની ભ્રમણામાં રાતભરી જાગી;
                           ભર્યા ઘરમાં હું કેમ રે પોકારું
કે રાજ, તમે થોડુંઘણું સમજો તો સારું.
આપણી તે મેડીએ આપણ બે એકલાં
                  ને ફાવે તેવી તે રીત મળજો,
મોટાં-નાનાંમાં મારે નીચાજોણું છે
                  રહો અળગા, ને વાટ ના આંતરજો;
                           મોટા ઘરની હું નાની વહુવારુ
કે રાજ, તમે થોડુંઘણું સમજો તો સારું.
૧૯૬૧

(ચાલ, વરસાદની મોસમ છે, પૃ. ૬૮)