કમલ વોરાનાં કાવ્યો/38 કાગળ

કાગળ

૧
ભૂરું આકાશ જોઈ
ધોળાં કબૂતર
ઊડ્યાં
ને
કાગળની જાળમાં
ફસાઈ ગયાં

૨
આ
કાગળની ત્વચા
ઉઝરડાઈ ગઈ છે
ને
લોહી
ગંઠાઈને કાળું થઈ ગયું છે

૩
ચારેબાજુથી
ઊડું ઊડું થાય છે
કાગળ
પણ વચ્ચે
બરોબર વચ્ચે
છાતી પર
મૂકેલું પેપરવેઇટ
એને
ટેબલ સાથે
જડી રાખે છે

૪
ઊછળતા દરિયામાં
અંઘારાનું જંગલ પસાર કરતા
હાલકડોલક ફાનસ જેવં
અસંખ્ય વ્હાણો ઊતરી પડ્યાં છે
ઘૂઘવતાં પાણીમાં સ્થિર થઈને
ગતિ પકડતાં વ્હાણો
હજુ તો સઢ ફેલાવે
ત્યાં પવન પડી ગયો
પાણી ઓસરી ગયાં
વ્હાણો વેરવિખેર ફસડાઈ ગયાં ને
ધીમેધીમે
એક સફેદ કાગળ
સપાટી પર ઊપસી આવ્યો

૫
આ અક્ષરો હેઠળથી
કાગળ
ખસી જાય તો?

૨

કાગળમાં
ઈંટ પર ઈંટ પર ઈંટ મૂકી. મુકાઈ.
વચ્ચે બરોબર સિમેન્ટ ભર્યો. ભરાયો.
પછી એક ખીલી ઠોકી. ઠોકાઈ.
ખીલી પર ખમીસ ટીંગાડ્યું. ટીંગાયું.
નિરાંતનો શ્વાસ લઈને
હું તો ઘસઘસાટ ઊંઘી ગયો
ને ફૂંકાતા પવનમાં
કડડડભૂસ
આખું આકાશ તૂટી પડ્યું મારી પર
કાટમાળ હેઠળ દટાઈ ગયેલો હું
બહાર નીકળી આવ્યો
ત્યારે
કાગળ પર એક પ્રશ્ન લખેલો હતો
ભાઈ, તમારું ખમીસ ક્યાં?

૩
હવે
નક્કી નથી થઈ શકતું
આ ભીંત છે
કે
કાગળ