અનુનય/તરસી તરસી
Jump to navigation
Jump to search
તરસી તરસી
તરસી તરસી ટેકરીઓ પર
વરસી વરસી વ્હાલ
ભલાજી તમે અમોને ભીનાં ભીનાં
વાદળ જેવાં
તાર તારથી ટપક ટપકતાં કીધાં
તેના સુખને સાટે
આપી દઉં બે છાતી પરના સૂરજ-ચંદર
આપું અબ્બી હાલ!
પરથમ પહેલું મસ્તક મૂક્યું
તમે ભલાજી વરતી લીધું નામ;
નામને અખ્ખર અખ્ખર ઊઘડ્યો
ગમતી ગંધ લઈ અલબેલો અલ્લડ કામ!
બાણ બાણથી ઠામઠામથી વીંધાયું
આખ્ખું ઊંડેરું આભ!
અમારી જાત
હવે તારલા ભરી ટપકતી રાત!
૧૮-૯-'૭૫