હેમંત ધોરડાનાં ચૂંટેલાં કાવ્યો/ગળામાં ક્યાંક અકારણ અટકતી આશમાં છું

ગળામાં ક્યાંક અકારણ અટકતી આશમાં છું
રહી રહી તને ખટકે છે એ કચાશમાં છું.

કળીની જેમ ઉઘડતા ઉજાસમાં હું હતો
ઉદાસ સાંજના ઝાંખા થતા પ્રકાશમાં છું.

છું સાથ સાથ અજાણ્યા સમયનાં બંધનમાં
હું બંધ આંખમાં જે છે એ મોકળાશમાં છું.

અધર પર આવીને અટક્યું એ નામમાં હું નથી
અધર કરડતાં જે ઉપસી છે એ રતાશમાં છું.

ફરી ફરી ન મને શોધ આંગળીઓમાં
તને હજી જે સ્મરણમાં છે એ ભીનાશમાં છું.