હેમંત ધોરડાનાં ચૂંટેલાં કાવ્યો/ખરતા તારાનું છું હું પ્રતિબિમ્બ તારા સરવરે

ખરતા તારાનું છું હું પ્રતિબિમ્બ તારા સરવરે
અટકળે માની લે જાણી લે મને તું આશરે

સરતાં વાદળનો હું છાંયો હમણાં છું હમણાં નથી
એક પળ બસ હોઉં હું પાંપણ પરે કે ઝાંખરે

ભાંગતા અંધારમાં સૂક્કાં પરણ બળવાની ગંધ
અબઘડી લે શ્વાસમાં હું અબઘડી છું વાયરે

એ જ પળ બસ એ જ પળ જળબુંદ થઈને આવજે
જ્યારે ભીંજાવું લખાયું હોય મારા કાંકરે

લીલછાયા કાંગરાની બીજી બાજુ ખીણ છે
કંઈ જો કહેવું હો કહી દે હમણાં છું હું કાંગરે

છંદવિધાન
ગાલગાગા ગાલગાગા ગાલગાગા ગાલગા