મંગલમ્/મારા જ્ઞાન-ગુમાનની

મારા જ્ઞાન-ગુમાનની

મારા જ્ઞાન-ગુમાનની ગાંસડી, ઉતરાવો શિરેથી આજ,
મારી પુસ્તક-પોથાંની પોટલી, ઉતરાવો શિરેથી આજ.

બોજો ખેંચી ખેંચી માથું દુઃખે, મારી કાયામાં કળતર થાય,
હાંફી હાંફી મારું હૈયું થાક્યું છે ને,
⁠આંખે અંધારાં ઘેરાય રે…ઉતરાવો૦

મોર-મુગટ, હાથે બાંસુરી ને રાધાનો આતમરામ
એવા રૂડા ગોપાળાને મળવા,
⁠તલસી રહ્યા મમ પ્રાણ રે…ઉતરાવો૦

વેદ ભૂલું વેદાંત ભૂલું, બધે દેખાય તારાં રાજ,
આવું છું ઓ વહાલા, હું તારે દ્વારે,
⁠દીવો પેટાવાને કાજ રે…ઉતરાવો૦