બજાવી મોહને બંસી
બજાવી મોહને બંસી, ભણાવ્યો પાઠ ખાદીનો,
જગાડી હિંદ આખાને સુણાવ્યો મંત્ર ખાદીનો.
વિદેશી માલમાં મોહી, બન્યા છો દેશના દ્રોહી,
દવા એ મોહને લાવી, બતાવ્યો માર્ગ ખાદીનો.
નિહાળી માલ પરદેશી, બન્યો’તો દેશ દીવાનો,
અજબ એ બંસીના નાદે, બનાવ્યો ભક્ત ખાદીનો.
થતો બરબાદ જે પૈસો, બધો આ દેશમાં વહેશે,
આબાદી દેશની કરવા, કર્યો ઉદ્ધાર ખાદીનો.
વિદેશી વસ્ત્ર પહેરીને, કરેલાં પાપ ધોવાને,
હવે પસ્તાઈને બંધુ, ધરી લે વેશ ખાદીનો.