દિલીપ ઝવેરીનાં ચૂંટેલાં કાવ્યો/કિમિદં વ્યાહૃતું મયા
અક્ષર અક્ષર વચ્ચે
થોડું ખરબચડું
પણ સાચ હજો
થોડા પથરા
થોડા ઠળિયા
થોડાં પીંછાં
થોડી ચગદેલી આંગળીઓ
થોડું લોહી
થોડાં આંસુ
થોડો ખારો કડવો તેજાબી પણ સ્વાદ હજો
ડૂસકાં ચીસો રાડ
થથરતાં જાનવરોનો ભાંભરિયો ઘોંઘાટ
તૂટતાં નળિયાં બળતાં વળિયાંનો તતડાટ
તરડતા કાચ ભાંગતાં ઠામ
વછડતાં જોડાં
નીંદર હબક્યાં બાળ
બટકતી કળી ઉખેડ્યો છોડ
ખોખરાં કાઠ વહેરતી કરવતનો ખોંખાર હજો
અક્ષર અક્ષર વચ્ચે
થોડા ઘાવ ફફોલા રાખ ધુંવાડા
થોડો પણ સૂનકાર હજો
આ કોરા કાગળ ઉપર
ખોળવા લયને
ચારેકોર ખોદતો જાઉં
હાથમેં બિન ધાગે કી સ્યાહ ટપકતી સૂઈ લઈ કે
ટપકે ટપકે
લીટી
દોરો
ટપકું લીટી
લીટી ટપકું
ટપકું ટપકું લીટી ટપકું ટપકું
... - - - ...
લીટી ટપકે આંક્યા મારા અક્ષર વાંકા રાંક કગરતા
કાગળ પાસે
નથી ઝાઝું કંઈ જોતું
ફૂટ્યાં નસીબ
છોને અરથ મળે ના
મળે ફક્ત જો અવાજ
થોડો લીંટાતો લટ
ટીપે ટીપે કરી તરીશું
ખરબચડું સાચું ખારું કડવું તેજાબી
તતડ ખોખરો સૂનો
અક્ષર અક્ષર વચ્ચે
લય શોધું છું રામ