અર્વાચીન ગુજરાતી કાવ્યસંપદા/ચન્દ્રકાન્ત ટોપીવાળા/રિણાવર
Revision as of 10:27, 13 July 2021 by MeghaBhavsar (talk | contribs) (Created page with "{{SetTitle}} {{Heading|રિણાવર|ચન્દ્રકાન્ત ટોપીવાળા}} <poem> રિણાવર રેલતા આવો ને રૂમ...")
રિણાવર
ચન્દ્રકાન્ત ટોપીવાળા
રિણાવર રેલતા આવો ને રૂમઝૂમ વહાણમાં
ઊંચે તાકીને ઊભા ખડકો, ટેકરા
એને વાદળ વિહોણા તડકા આકરા
એણે વહેતા જોવાનો નરદમ કાંકરા
રિણાવર રેલશો તો સોનું રળીશું ખાણમાં.
સૂકાં મોજાંઓ ખખડે છે અહીં પાછલાં,
ઊની રેતમાં તરે છે અહીં માછલાં
ભીનાં સપને જઈ આવે અહીં છીપલાં
રિણાવર રેલશો તો પાણી ચઢશે પહાણમાં.
ભૂરા ઘૂઘવે ખાલીપા એકસામટા,
ધોળા લૂણના ફરકાવે સો સો વાવટા
કાળા પડછાયા ઊડે છેક છાકટા
રિણાવર રેલો તો રાતાં લોહી ઝાણમાં.
(પક્ષીતીર્થ, પ્ર. આ. ૧૯૮૮, પૃ. ૧૦૫)