હેમેન શાહનાં ચૂંટેલાં કાવ્યો/સુખ દુ:ખ

સુખ દુ:ખ

સુખદુઃખ છે મનની પાટીએ, જગ્યા જરાય નહિ,
ભૂંસ્યા વગર તો એક પણ પંક્તિ લખાય નહિ.

દાવા-દલીલ માટે જરૂરી છે બારીકી,
મોટેથી બોલશો તો કંઈ પુરવાર થાય નહિ.

તરતું મૂકી લખાણ, ખસી જાવ બાજુએ,
કાગળની હોડીને કદી ધક્કા મરાય નહિ.

માપી, ગણી શકો એ બધું કામનું નથી,
જો છે મહત્ત્વનું તો એ તોળી શકાય નહિ.

નાનું જરાક રાખો અનુસ્વાર ‘હું’ ઉપર,
આખો વખત વજનને ઉઠાવી ફરાય નહિ.

અંતે ખરી જવાનીયે તાકાત જોઈએ,
પ્હેરો સુગંધ એટલે ફૂલો થવાય નહિ.
આખરે ૪