કાવ્ય-આચમન શ્રેણી – સુરેશ દલાલ/પંથ એક ફૂટ્યો
Jump to navigation
Jump to search
૨૦. પંથ એક ફૂટ્યો
મારા પગલાથી પંથ એક ફૂટ્યો
કે પંથમાં પગલાં બંધાયાં, હું છૂટ્યો!
વાસંતી વાયરે પાંદડાંની જેમ જોયો
પંખીની પાંખોનો કંપ;
ઊડતા એ ટહુકાઓ આકાશે ઊઘડે
તારલિયા થઈને અનંત.
મેં તો મૌન મહીં ટહુકો એક ઘૂંટ્યો
કે પંથમાં પગલાં બંધાયાં, હું છૂટ્યો!
વાદળના વણઝારા સૂરજને આવડે છે
શેવાળે સ્હેલવાની રીત;
સૂરજમુખીનું મુખ ઊંચું કરીને સ્હેજ :
જળમાં જઈ રેલે છે પ્રીત.
ચાંદ જરા જળમાં ડૂબ્યો ને નભે ઊગ્યો
કે પંથમાં પગલાં બંધાયાં, હું છૂટ્યો!
૧૯૬૯(કાવ્યસૃષ્ટિ, પૃ. ૯૪)