ગુજરાતી નારીસંપદા : કવિતા/અટકળ મળે

પળ મળે!

જયશ્રી વિનુ મર્ચન્ટ ‘ભગ્ન’

⯐

ખુલ્લી પાંપણ પાછળ સંતાયેલી બસ અટકળ મળે!
કોશેટામાં બંધ ભલે પણ રેશમ, રેશમ પળ મળે!

પરપોટાની અંદર જ છુપાયેલું લ્યો, એ નીકળે!
શોધો ક્યાં ક્યાં ને અંતે ક્યાંથી જો ગંગાજળ મળે!

અંધારામાં એક કિરણભર અજવાળું બસ જોઈએ!
ત્યાં તો નભ છલકાવી દેતો પ્રકાશ જ ઝળહળ મળે!

સહુ પ્રશ્નોના ઉત્તરો સાથે જ મળે ક્યાંથી જિંદગી?
ક્યારેક પ્રશ્નો ને ક્યારેક ઉત્તરો અમથા સરળ મળે!

આથી જ અકારણની એની નફરત કરી મેં સદા સહન!
‘ભગ્ન’ ખબર છે કોને, ભલાઈનું શું ને ક્યાં ફળ મળે!

***