ગુજરાતી નારીસંપદા : કવિતા/વટપૂર્ણિમા

વટપૂર્ણિમા

જ્યોત્સ્ના ય. ત્રિવેદી

⯐

વટપૂર્ણિમા છે આજે
સોળ સજી શણગાર મેં પૂજા કરી
વટવૃક્ષને બાંધ્યા કર્યો
કાચા સૂતરનો તાંતણો...

સૂતરનો તાંતણો લઈ ફરતાં ફરતાં
હું જ બંધાતી ગઈ
તારામાં
તારા આદિ વટવૃક્ષમાં
તારા સહસ્ત્ર જન્મોની આદિ કથાઓમાં

હજીયે
મધુર ગૂંચમાં ગૂંચવાયેલી જ છું
અને
જોયા કરું છું આકાશથી
આ વટપૂર્ણિમાનો મારામાં વિસ્તાર
મારી પૃથ્વીના ઉર્ધ્વમૂલને-

***