ચાંદરણાં/હળવાશ
Jump to navigation
Jump to search
33. હળવાશ
- સાબુ લપસે તોયે તેનું ચરિત્ર ખંડિત થતું નથી.
- બહેરાશનો રોગ સૌથી વધારે સરકારી અમલદારોમાં હોય છે.
- કલર મૅચિંગની શરૂઆત પાડા પર બેસીને આવતા યમરાજાએ જ કરી હશે.
- કાપડિયાને કહીએ કે ‘કપડાં કાઢો’ તો એ શરમાતો નથી.
- સૌંદર્યસ્પર્ધામાં તો ઓછામાં ઓછાં કપડાં જ ‘ઊતરી’ શકે.
- એકવાર નક્કી કર્યા પછી વ્યસન સરનામું બદલતું નથી.
- નિંદાને પગ વાળીને બેસવાની ટેવ જ નથી.
- ઉંદર આડો ઊતરે એ બિલાડી માટે શુકન કહેવાય.
- મહંમદ બેગડો ગુજરાતની ‘લિમિટેડ થાળી’ વિશે કશું જાણતો ન હતો.
- નાકનાં નસકોરાં એક જ આંતરરાષ્ટ્રીય ભાષા બોલે છે.
- પરપોટાના ગોળાકારને ગબડાવે તો જાણું કે તું શાણો છે.
- નળની ચકલીને ચોર જ પાંખ આપી શકે!
- માણસને નહીં, એના ફોટાને જ ટાંગી શકાય છે!
- ક્રિકેટનો દડો લક્ષ્મણરેખા ઓળંગે તો તાળીઓ પડે!
- ગાઈડ જાણે છે કે શાહજહાંએ મારા ગુજારા માટે જ તાજમહાલ બંધાવેલો.
- ચકલીના પીંછાંથી રામાયણ-મહાભારત નહીં, હાઈકુ જ લખાય.
- ગુલાબી વાતાવરણ માત્ર શયનખંડમાં જ નહીં, શૅરબજારમાં પણ હોય છે.
- પડે છે ત્યારે સઘળું નથી પડતું, વિરોધીઓ ઊભા હોય છે.
- ઈશ્વર નખ આપે, નેઈલ પૉલિશ થોડું આપે?
- ભૂત, બંગલામાં રહે પણ ભાડું ન ભરે!
- મૂરખ સાપ, પક્ષ બદલવાને બદલે હજી કાંચળી બદલ્યા કરે છે!
- સાહિત્ય અને સંગીત એવાં ઘરેણાં છે, જેને શ્રીમંતો વારતહેવારે ધારણ કરે છે.
- કોલસાને અગ્નિ સિવાય કોણ ઊજળો કરે?
- કાયદો અને વ્યવસ્થા ખાડે નથી ગયાં, અંડરગ્રાઉન્ડ થયાં છે.
- કૃષ્ણભક્ત થયા તો ગોકુળઆઠમે જુગાર રમ્યા વિના ચાલે?
- અવસાન વિશે ગેરસમજ ન થાય તે માટે એને ‘દુઃખદ’ કહેવાય છે.
- દેવ થવાનો સહેલો માર્ગ એ છે કે વહુને દેવી કહેવા માંડો...
- ચૂંટણીના ઉમેદવારો અને સંક્રાન્તિના કનકવા એકસરખા!
- વક્રોક્તિની જનેતા સાસુ છે!
- કયો ભમરડો સ્વેચ્છાએ ઘૂમે છે?
- સૂર્યપ્રકાશને તડકો થતાં વાર લાગે, એટલી નીરાને તાડી થતાં વાર લાગે!
- સુરતી અંગ્રેજી બોલે તો બુદ્ધ બુદ્ધા નહીં, પણ બુઢ્ઢા થઈ જાય!
- દરજીની સોય કરતાં હવે ડૉક્ટરની સોય વધારે કમાણી કરે છે.
- બધા ભગતડા હવે તગડા જ હોય છે!
- ગૃહજીવનમાં યુગ આવે, ક્રાન્તિને અવકાશ નથી.
- પાકિસ્તાની સરહદરેખાને વિગ્રહરેખા થઈ જવાના અભરખા છે.
- કેળાની લૂમ કહે છે અમારા કુટુંબમાં બધાં સરખાં!
- નેતાનો શોક પ્રજા ન પાળે તોય રેડિયો-ટીવીએ તો પાળવો જ પડે!
- અભરખા ભીમ જેવા, દશા અગિયારશ જેવી!
- હે વરરાજા! તમે ન હોત તો જૂની રંગભૂમિના અસ્ત પછી પતરાની તલવારનું શું થયું હોત!
- અંદરઅંદર કાંકરા અથડાય અને કહે કે ઘૂઘરો વાગે!
- રિક્ષાવાળાને માત્ર પોતાના ઘરનો જ ટૂંકો રસ્તો ખબર હોય છે!
- ગરીબના દીકરાએ મોસંબીનો રસ પીવા માંદા થવું પડે છે.
- પોતે લખેલા શબ્દો ભૂંસવાની હિંમત માત્ર શિક્ષકમાં જ હોય છે.
- સસરો ઘર બદલે તો વરઘોડાની દિશા બદલાય.
- સોનીને તો બીજાની વહુ ઘરેણાં પહેરે એ જ ગમે ને?
- ડાકણને કોઈ શાબાશી નથી આપતું, કારણ કે એને થાબડવા માટે વાંસો જ નથી હોતો.
- આપણે માણસ છીએ એટલે કોઈ આપણી બાધા નથી રાખતું.
- ગુલકંદ દ્વારા ગુલાબોનો મીઠો મરણોત્સવ ઉજવાય છે.
- રંગલો જ હવે તો બંગલો બાંધે છે!
- કાંટાની સહનશીલતા ખોટું વજન બતાવે!
- ડોસી મરે એનો વાંધો નથી, મર્યા પહેલાં વીલ નથી કરતી એનો વાંધો છે!
- તોલવાનું ટાળનારો છેવટે જોખી નાખે છે.
- લોકો ઊંઘ કાઢે છે, કેટલામાં તે જાણતા નથી.
- ટ્રેન મોડી આવે તે સમાચાર અને સમયસર આવે તે અકસ્માત કહેવાય.
- ગુસ્સાનું આયુષ્ય માણસના હોદ્દા પર આધાર રાખે છે!
- ઈંડાની દીવાલને ધોળવી ન પડે!
- માંકડ એવી બ્લેડબૅંક છે કે જેની પાસે દરેક વર્ગનું લોહી મળે!
- સ્પર્શસુખ એવું છે કે કૉલબેલ પણ ચીસ પાડે!
- ચોમાસે મારગડો રગડો થઈ જાય છે!
- વર્ષો પછી તે છોકરીને જોતાં લાગ્યું કે નવલિકા નવલકથા થઈ ગઈ.
- સાહિત્યમાં ચોરી કરતા ભય લાગે છે કારણ કે ચોરની સંખ્યા ઘણી મોટી છે.
- વાઘને કંઈ કાળજું કઠણ રાખવાની શિખામણ અપાય?
- વરસાદ પાસે પબ્લિક ડિસ્ટ્રિબ્યુશન સર્વિસ હોય છે!
- માંદો માણસ શું કંઈ નથી કરતો? એ દવા તો કરે છે!
- માથે દેવું હોય ત્યારે કેટલાક વિસ્તારોમાં કરફ્યુ હોય છે.
- નાગો નહાય તો ખરો પણ નિચોવે નહીં.
- હૃદયરોગ તો નળના પાણીને પણ માળ પર ચઢાવવાની ના પાડે!
- અમેરિકા પહેરેગીર છે, કયો દરવાન પોતાના ઘરના દરવાજે પહેરો ભરે છે?
- દરેક દવા ડૉક્ટરને ‘સારો ફાયદો’ કરે છે!
- અલ્લાએ નહીં મુલ્લાએ બનાવી જોડી!
- દરેક કુંવારો ‘અજોડ’ હોય છે!
- વિવેચકને ઉદાર થવાનું મન થાય ત્યારે એ પ્રસ્તાવના લખે છે!
- લખનારા બધા વાંચીને સાહિત્યસેવા કરે છે!
- પગ પૂજાતા હોય તો કોઈ મોજાં ન પહેરે!
- કયામતના દિવસે પણ સરકારી સાહેબો પાસે નિકાલ થયા વિનાની ફાઈલો હશે!
- જુનવાણી અંગ્રેજો સુરતમાં પીપને બદલે કોઠી મૂકી ગયા!
- કમિશન – કમાણીનું મિશન!
- પતિ પ્રેમી હોય એવી ગેરસમજ ઘણી લોકપ્રિય છે.
- રાવણના પેટમાં હવે પાપ નહીં, ફટાકડા હોય છે!
- અમેરિકાની પવિત્ર ફરજોમાં દાદાગીરીનો પણ સમાવેશ થાય છે.
- બકતાં બકતાં બોલવા માંડતા ઓછા, બોલતાં બોલતાં બકવા માંડનારા ઘણા!
- આશીર્વાદો વાયદે મળશે, ગાળ બધી જ રોકડી આવી!
- દરેક ઘૂઘરા પાસે પોતીકા કાંકરા હોય છે.
- આંગણાં વાંકાં ન હોત તો નૃત્ય માટેનાં સીધાં સ્ટેજ હોત ખરાં?
- પોતાનો અવાજ પોતે સાંભળવો હોય તો ફેરિયા થવું પડે!
- મફત મુસાફરી કરવી અને વળી ટ્રેન મોડી પડ્યાની ફરિયાદ પણ કરવી!
- જોડો ડંખે તે પહેલાં જોડાની કિંમત ડંખે છે!
- સસ્પેન્ડ થાય તે સેકન્ડહેન્ડ થયો એમ કહેવાય ખરું?
- લક્ષ્મીજીની લાચારી એ છે કે જે પ્રધાન થાય તેના પર એમણે રિઝવું જ પડે!
- દીકરાનું લેસન કરી આપે તો માએ ‘ઘરકામ’ કર્યું કહેવાય!
- ફૂટપાથ પર રહેનારને પણ ‘ઘરવાળી’ હોય છે!
- ઘાંટાઘાંટ એ વાટાઘાટનું જ તોફાની બાળક હોય છે!
- બત્રીસ દાંતમાં દાઢ પણ આવી જાય હં...!
- ગરીબના કેલેન્ડરમાં સૌથી વધારે અગિયારસ હોય છે!
- વસ્તીવધારાનો દર ગણેશજીની મૂર્તિને સૌથી વધુ લાગુ પડે છે.
- ઘંટીને જીભ નથી એટલે મરચાં દળી શકાય છે.
- ઢોળાયેલું દૂધ બિલાડી માટે હોય છે!
- વારસદારો પાસે ઊઠમણાની જાહેરખબર છપાવવાના પૈસા ભેળા થશે ત્યાં સુધી હું જીવીશ!
- આકાશી વીજળીની ચોરી નથી થતી!
- આદરનાં મૂળ કંઈ જમીનમાં ન હોય!
- ટ્રેન અકસ્માતમાં મરનારા બધાય લાખેણા થાય.
- એક ઘોડો કેટલાક વરને યાદ રાખે?
- બધા જ રમખાણિયાઓનું લોહી એક જ!
- શ્લોક લખો કે ગાળ પેન તટસ્થ જ રહે છે.
- પ્રેમપત્ર પણ માગણાનાં બિલ જેવો હોઈ શકે છે!
- કોઈનો ન્યાય તોળશો નહીં, ન્યાયાધીશની નોકરીનું રક્ષણ કરો!
- ઘડિયાળ અને ટ્રેનને બારમો ચંદ્રમા હોય છે!
- સમાન પ્રેમથી જ નહીં સમાન ભ્રમથીયે પરણી શકાય છે!
- મહત્ત્વાકાંક્ષાને વાડ કે છત હોતી નથી.
- શિક્ષિતની ઓળખ એ છે કે તે પરીક્ષામાં જ ચોરી કરે!
- તુલસી સંગત સાધુકી, ગાંજા બહુત પિલાય!
- દીકરો રડે તો દીકરાનો ઘૂઘરો બાપે વગાડવો પડે!
- ડૉક્ટરે આપેલી દવા કરતાં બિલ વધારે કડવું હોય છે.
- બાથરૂમ કપડાં ઉતરાવે અને અરીસો કપડાં પહેરાવે.
- સૌંદર્ય પ્રસાધનો બ્યૂટી માટે ડ્યૂટી બજાવે છે.
- સરકાર પોલીસની ભરતી કરે છે એનો અર્થ એણે ગુનાખોરી અંગે આશા નથી ગુમાવી.
- દિલ હોય છે ત્યાં જ રહેવા દઈને ચોરી શકાય છે.
- ઈશ્વર અલ્લા તેરે નામ, મંદિર મસ્જિદમેં પકવાન!
- આટલાં બધાં સદાવ્રત, ભૂખમરાના પુરાવા છે!
- લત ખરાબ હોય તો હાલત પણ ખરાબ હોય!
- પાસ થયેલો છોકરો માબાપનું નહીં, શાળાનું ગૌરવ કહેવાય છે!
- ગરીબીનો વારસાહક્ક પણ મળે જ!