બાળ કાવ્ય સંપદા/કાગળની હોડી

કાગળની હોડી

મૂળજીભાઈ પીતાંબરદાસ શાહ
(1910-1975)

કાગળની મેં હોડી બનાવી, નાની સરખી હોડી;
સોહે કેવી સારી એ તો, જડશે ના જગ જોડી.
નાની સરખી હોડી.
કાગળની૦

સાંજ પડી ને ફરવા ચાલ્યો, સાથે લીધી હોડી;
બાપુ સાથે નદીએ આવ્યો, રેતીમાં હું દોડી.
નાની સરખી હોડી.
કાગળની૦

ખળખળ કરતી વહેતી નદીમાં, નાંખી મેં તો કોડી;
જઈને એ તો તળીએ બેઠી, જોઈ રહ્યો કર જોડી.
નાની સરખી હોડી.
કાગળની૦

પાણીમાં જ્યાં હોડી મૂકી, ડોલે થોડી થોડી;
પવન સપાટે આગળ વધતી, જાણે દોડી ઘોડી.
નાની સરખી હોડી.
કાગળની૦

પાણી નાચે, હોડી નાચે, નાચું અંગ મરોડી;
દૂર દૂર દોડી હોડી મારી, ઘેર ગયો એ છોડી.
નાની સરખી હોડી.
કાગળની૦