બાળ કાવ્ય સંપદા/માછલી
Jump to navigation
Jump to search
માછલી
લેખક : અમૃતલાલ પારેખ
(1904-1990)
હું તો જળની રમનાર રે,
જળની ભમનાર રે,
હું જળઘેલી માછલી !
મારે જળના આહાર રે,
જળના વિહા૨ રે,
હું જળઘેલી માછલી !
મને તેડે તરંગ રે,
ઝૂલવા ઉછંગ રે,
હું જળઘેલી માછલી !
જોઉં તરતાં હું વહાણ રે,
ઊડતાં વિમાન રે,
હું જળઘેલી માછલી !
તમે આવો મુજ ઘેર રે,
ત્યાં મોતીની મ્હેર રે,
હું જળઘેલી માછલી !
મને પૂરીને હોજ રે,
માણે જન મોજ રે,
હું જળઘેલી માછલી !
મને જળ શું બહુ નેહ રે,
ધારું ના દેહ રે,
હું જળઘેલી માછલી !
તમે રાખો એ રીત રે,
જળ-મીનની પ્રીત રે,
હું જળઘેલી માછલી !