મનોહર ત્રિવેદીનાં કાવ્યો/ચ્હેરા
Jump to navigation
Jump to search
ચ્હેરા
સડકે સડકે હસતા ચ્હેરા,
દ્વારે દ્વારે વસતા ચ્હેરા.
હું નિજમાં વિકસતો ને એ
મારામાં વિકસતા ચ્હેરા.
બાળક શા એ મુગ્ધ મનોહર,
મુકત મને વિલસતા ચ્હેરા.
એની ચંચલ રમત નિખાલસ,
ક્યાં ય રહે શું અછતા ચ્હેરા?
પલપલ હું ભીંજાતો જાતો,
મૂંગુ હેત વરસતા ચ્હેરા.
ચૂમી દર્દભીની આંખોને,
સારી રાત કણસતા ચ્હેરા.
અહેાભાગ્ય, જ્યાં ચરણ જાય આ–
દૂર કદી ના ખસતા ચ્હેરા.