હેમંત ધોરડાનાં ચૂંટેલાં કાવ્યો/કદી આમ ખળખળો છો કદી તેમ છોળ ભળતા
Jump to navigation
Jump to search
કદી આમ ખળખળો છો કદી તેમ છોળ ભળતા
અમે કણથી કણ ભટકીએ તમે વાછટે ઊછળતા
અમે જાતના ગરગડી તમે હાથ આજનમ છો
બહુ પાસ પાસ આવી તમે પાછું પાછા વળતા
ન કશે નજરમાં ચડીએ ન ખબરમાં ક્યાંય મળીએ
અમે વાડથી ન વધીએ તમે ઊંચી ડાળ લળતા
વળી ડગડગર અટકવું વળી ભીડમાં ભટકવું
અમે વસમી વાટ વળીએ તમે ફૂલથી નીકળતા
અમે ખાલી હાથ ડાબે અમે ખાલી હાથ જમણે
તમે છેતરો ઉજાસે તમે ચાંદનીમાં છળતા
છંદવિધાન
લલગાલગા લગાગા લલગાલગા લગાગા