અર્વાચીન ગુજરાતી કાવ્યસંપદા/સુધીર દેસાઈ/તડકો
Revision as of 06:17, 13 July 2021 by MeghaBhavsar (talk | contribs)
તડકો
સુધીર દેસાઈ
તગ તગ તગતો તડકો...
અહીં અડકો કે ત્યાં અડકો, બસ જામે વટનો કટકો...
જરા ધરા પર પગ મૂકો ત્યાં
કાળઝાળ થઈ બટકે;
છાંય મહીં ત્યાં સહુ ચાલે ને
ના કોઈ એને અડકે.
એક તરાપે શિકારને બસ બાઝી પડતો ભડકો...
એ જ શિયાળે પીઠ શેકતો
હૂંફ આપતો નીકળે;
હિમની ચાદર એના પરશે
હળવે હળવે પીગળે.
સોનાવરણી કાય કરી દે સમય મહીં જઈ અડકો...
તગ તગ તગતો તડકો...