ઉદયન ઠક્કરનાં ઉત્તમ કાવ્યો/સમૂહગાન

સમૂહગાન

સમૂહ :
⁠પ્રેમ અમારો મહાદેવ, ને અમે પ્રેમના નંદી જી
⁠આંખ મારતી જે જે છોરી, અમે એમના બંદી જી!

અવાજ ૧ :
⁠એક છોરીએ અંગોમાં સાગરનાં મોજાં રાખ્યાં છે
⁠અટકળની આ વાત નથી, મેં થોડાં થોડાં ચાખ્યાં છે...
⁠ઠેર ઠેર એની કાયામાં વમળ-વર્તુળો ઊઠે છે
⁠ઊંડે તાણી જાય છે, મારા
⁠શ્વાસો
⁠ક્રમશઃ
⁠તૂટે છે

સમૂહ :
⁠પ્રેમ અમારો મહાદેવ, ને અમે પ્રેમના નંદી જી

અવાજ ૨ :
⁠મોડું-વ્હેલું નિશ્ચિત છે, ને તો પણ એને ટાળે છે
⁠જળસમૂહને એક છોકરી તણખ્ખલાથી ખાળે છે
⁠દીવાસળીના દેશમાં, રમણી, કેમ બચીને રહેવાશે?
⁠મીણનો જથ્થો નષ્ટ થશે, પણ અજવાળાંઓ ફેલાશે

સમૂહ :
⁠પ્રેમ અમારો મહાદેવ, ને અમે પ્રેમના નંદી જી

અવાજ ૩ :
⁠શરીર નામે પરિસ્થિતિથી છટક્યું, એ તો છટક્યું રે!
⁠રૂપ કોઈનું, અટકળથી પણ આગળ જઈને અટક્યું રે!
⁠જાણે પંખી ડાળ મૂકીને, જાત હવામાં ફેંકે જી
⁠અથવા દૈનિકમાંથી શીર્ષક, વાચક સુધી ઠેકે જી

સમૂહ :
⁠પ્રેમ અમારો મહાદેવ, ને અમે પ્રેમના નંદી જી

---

◼

સમૂહગાન • ઉદયન ઠક્કરનાં ઉત્તમ કાવ્યો • ઑડિયો પઠન: શૈલેશ
◼

---