કાવ્ય-આચમન શ્રેણી – ચિનુ મોદી/૧૪.ખાલીપો

૧૪.ખાલીપો

ખાલીપાની વચ્ચે ખૂટું,
એમ અમસ્થું બબડું જૂઠું.

શણગારેલાં સપનાં જેવી
આંસુની આંખોને લૂછું.

ખોડંગાતા ઘરના રસ્તે
પથ્થરના પગ ક્યાંથી મૂકું ?

જિર્ણ વૃક્ષના જર્જર-મનમાં
પાંચ પાંદડાં ક્યાંથી મૂકું ?

વ્હેવાનો આશય અણધાર્યો,
પ્હાડ નદીમાં ક્યાંથી મૂકું?

નગર નામનું પિંજર તોડી
પંખી જેવું ક્યાંથી ઊડું ?

હોવાનો આભાસ ભયાનક
દૂર ઊભો દરિયામાં ડૂબું.
(દર્પણની ગલીમાં, પૃ.૨૦)