છોળ/છળ

છળ

                ⁠કુંજ કુંજ કેસુડા કોળ્યા હો લાલ!
હૈયું હિલોળી ઊઠે હરખે કે હાંર્યે એવા
                ⁠ઠેર ઠેર રંગ રૂડા ઢોળ્યા હો લાલ!
               ⁠ કુંજ કુંજ કેસુડા કોળ્યા હો લાલ…

‘ઝૂલણ તળાવડીની ઓતરાદી કાંઠના
                ⁠જળમાં જ્યાં ઢળી રહી ઝાંય,
કોરાધાકોરી કોઈ ચૂંદડી ઝબોળે ને
                ⁠અંગઅંગ ચોળીને ના’ય
જોવનનો રંગ કદી ઝાંખો પડે ન ઈનો
ડાળ ડાળ એવું સૂડા બોલ્યા હો લાલ!’
કુંજ કુંજ કેસુડા કોળ્યા હો લાલ…

હોંશે હોંશે ઈ નીર ના’યાં ને ઓઢી જૈં
                ⁠ચૂંદલડી ઝાંયમાં ઝબોળી,
ક્યાં રે જઈએ ને હવે કોને તે કહીએ કે
                ⁠રોમરોમ પ્રગટી છે હોળી!
ભરમાયાં ભોળાં અમીં, અમને શી જાણ માંહી
                ⁠કામણ તે કાંઈ કૂડાં ઘોળ્યાં હો લાલ!
                ⁠કુંજ કુંજ કેસુડા કોળ્યા હો લાલ…

૧૯૫૯