દલપત પઢિયારની કવિતા/ઝાડ થવાનું મન
લીલાં લીલાં ઝાડ કે અમને ઝાડ થવાનું મન,
ઝાડ થવાનું મન કે અમને ચડવું ઊંચે ગગન!
લીલાં લીલાં ઝાડ કે અમને ડાળ થવાનું મન,
ડાળ થવાનું મન કે અમને ઝૂલવું વન-ઉપવન!
લીલાં લીલાં ઝાડ કે અમને પાન થવાનું મન,
પાન થવાનું મન પંખીનું ગાન થવાનું મન!
લીલાં લીલાં ઝાડ કે અમને ફૂલ થવાનું મન,
ફૂલ થવાનું મન કે ફોરમ લઈને ફરું પવન!
લીલાં લીલાં ઝાડ કે અમને થડ થવાનું મન,
થડ થવાનું મન અડીખમ પહાડ થવાનું મન!
લીલાં લીલાં ઝાડ કે અમને મૂળ થવાનું મન,
મૂળ થવાનું મન ધરાની ધૂળમાં થવું મગન!