મણિલાલ હ. પટેલનાં કાવ્યો/ચોમાસું : ગીત
ફળિયામાં પાદરમાં સીમ અને વગડામાં ચોમાસું બેકાબૂ રાનમાં
દોમદોમ માટીની સાહ્યબી લીલપ થૈ ઝૂલે છે વરણાગી પાનમાં
ભાઈ હવે ઓરે છે નેહ નર્યો ચાસમાં
ઓળઘોળ ગામ અને સીમ સાવ પાસમાં
આખ્ખું આકાશ પણે આળોટે ઘાસમાં
પહાડો મન મૂકી ઓગળતા આવ્યા, લ્યે! ઝરણાંના ગાનમાં
દોમદોમ માટીની સાહ્યબી લીલપ થૈ ઝૂલે છે વરણાગી પાનમાં
કોક મને બોલાવે વાદળમાં પ્હાડમાં
મન મારું મસ્ત અહીં વેલા ને વાડમાં
વૃક્ષોનું ગામ ઘડી ડોલે છે તાડમાં.
ખીણોમાં ઊછળતી કુંવારી નદીઓ, લ્યો! આવી પૂગી રે મેદાનમાં
ફળિયામાં પાદરમાં સીમ અને વગડામાં ચોમાસું બેકાબૂ રાનમાં...