અર્વાચીન ગુજરાતી કાવ્યસંપદા/જિગર ટંકારવી/બહુ વાર લાગી

બહુ વાર લાગી

જિગર ટંકારવી

પ્રેમ-મોતી પામતાં, બહુ વાર લાગી,
દિલનો દરિયો ડહોળતાં, બહુ વાર લાગી.

જિંદગીમાં જે થયું એ થઈ ગયું પણ,
જે થયું એને થતાં, બહુ વાર લાગી.

લોકલાજે કે પછી છે ટેવ એની,
નામ મારું બોલતાં, બહુ વાર લાગી.

થઈ ગયા છે બંધ સૌ દ્વારો ખૂલીને,
જ્યાં ગયો હું ત્યાં જતાં, બહુ વાર લાગી.

થઈ ગયો એક જ ચમત્કારે તું ઈશ્વર,
ને મને માનવ થતાં, બહુ વાર લાગી.

આપણા સંબંધ જાણે જળ-તરંગો,
તોય એને તોડતાં, બહુ વાર લાગી.

શબ્દની ગૂંચો જિગર ઉકેલવામાં,
આ ગઝલ સંવારતાં, બહુ વાર લાગી.