અર્વાચીન ગુજરાતી કાવ્યસંપદા/દિલીપ ઝવેરી/કોરા કાગળ ઉપર

From Ekatra Wiki
Jump to navigation Jump to search


કોરા કાગળ ઉપર

દિલીપ ઝવેરી

કોરા કાગળ ઉપર
લાલ શાહીથી લખવાથી વસંત નથી આવતી
કે લીલી શાહીથી વરસાદ

ફાગણ લખવાથી ગુલાલી ગંધ નથી આવતી
કે અષાઢ લખવાથી હરિયાળી

ભૂરી શાહી સમુદ્રથી આકાશ લગી
કે કાળી શાહી અમાસ સુધી
નથી પહોંચતી

લોલક લખતાંક વશીકરણનાં સપનાં નથી છવાઈ જતાં
સાચ લખવાથી કાગળ કાચ નથી બનતો
લખેલું છેક્યા પછીય કશું ઢંકાતું નથી
ટપકું કરીને અટકી જવાથી મનમાં સંતાડી રાખેલું છતું નથી થતું
જેમ પાંખડી લખવાથી બાગ નથી ઊગતો
એમ જ કવિતા નામનો શબ્દ લખવાથી
કવિતા નથી થતી.
‘સાહચર્ય વાર્ષિકીઃ ૨૦૧૬’