અર્વાચીન ગુજરાતી કાવ્યસંપદા/ધીરુ પરીખ/પોપટ બેઠો

From Ekatra Wiki
Jump to navigation Jump to search
પોપટ બેઠો

ધીરુ પરીખ

અધખૂલી આજ વસારે
પોપટ નાનો આવી બેઠો
જીરણ ઘર-મોભારે.
આછો એવો એક ટહુકો કીધો,
વનનો આખો ઉઘાડ વેરી દીધો!
બટકેલુંયે નેવેનેવું
પાંદ બનીને ફરક્યું,
વળીઓની ડાળેથી શીળું
કિરણ છાનકું સરક્યું,
ભાત ભાતનાં ફૂલ પાંગર્યાં
ઈંટ ઈંટ પર,
સાવ શૂન્યનું ફળ ઝૂલતું તે
પોપટના ટહુકાએ ટોચ્યું,
ચાંદરણાંનાં પતંગિયાં શાં
ફૂલ ફૂલ પર ઊડ્યાં!
પલભરમાં તો
વનનો ઘેઘૂર ફાલ ઝૂમતો હેઠો
પોપટ નાનો ઘર-મોભારે બેઠો!
(ઉઘાડ, ૧૯૭૯, પૃ. ૩)