અર્વાચીન ગુજરાતી કાવ્યસંપદા/હસિત બૂચ/નિરંતર
Jump to navigation
Jump to search
નિરંતર
હસિત બૂચ
એક નિરંતર લગન;
અમે રસ પાયા કરિયેં!
એકબીજામાં મગન :
અમે બસ ગાયા કરિયેં!
કોઈ ચાંગળું લિયે, પવાલું
કુંભ ભરે, જો રાજી!
કોઈ કરે છો ને મુખ આડું,
ને ઇતરાજી ઝાઝી!
છાંય હોય કે અગન :
અમે રસ પાયા કરિયેં!
સફર મહીં હો ઉજ્જડ વગડો,
કે નગરો ઝળહળતાં,
યાળ ઉછાળે ખારો દરિયો,
કે ઝરણાં ખળખળતાં,
હવે મુઠ્ઠીમાં ગગન!
અમે બસ ગાયા કરિયેં!
(નિરંતર, ૧૯૭૩, પૃ. ૩)
હસિત બૂચ • એક નિરંતર લગન; અમે રસ પાયા કરિયેં! • સ્વરનિયોજન: અમર ભટ્ટ • સ્વર: અમર ભટ્ટ