કાવ્ય-આચમન શ્રેણી – કૃષ્ણલાલ શ્રીધરાણી/૪૯. શાંતિના શિલ્પીઓ

૪૯. શાંતિના શિલ્પીઓ

શાંતિના શિલ્પીઓની મૂર્તિ બે નિહાળો, ભાઈ !
અનેક હસ્તવાળી આ બે શક્તિઓ નિહાળો, ભાઈ !
એક મુખ પૂર્વમાં,
એક પશ્ચિમે ધર્યું,
બેઉના સમાસ સમું
એક ચિત્ત કોતર્યું
ડંખતા અણુથી, તૂટતા અણુથી ભાવિએ
ને એક મંડપે જડ્યું.
ચતુર્ભુજી કરાલ આ બે મૂર્તિઓ નિહાળો, ભાઈ !
એક હસ્તમાં અણું કે જ્યાં ખીલેલ પદ્મ વક્ર.
એક હસ્ત ચંદ્ર માનવે સૃજેલ, છાંડી ચક્ર.
એક હસ્ત જંતુ-યુદ્ધનો પ્રભાવ, જ્યાં હતો
શંખ પાંચજન્ય. એક હસ્તમાં થતો છતો
મનુષ્યને પશુ કરી બતાવવા તણો છક્કો.
ઢીંક ઝીલતા મતેલ આખલા થીજી ગયાં;
એકમેકની બ્હીકે બે શિલ્પી શિલ્પમાં ઠર્યાં.
ટક્કરે મઢેલ મસ્તકો તળે
નીતરે
વિશ્વશાંતિના વહેણ;
સ્વેદ પ્રેમને સ્થળે.
(સમાન ધારની કટાર બે ચડેલ ટક્કરે,
યુદ્ધના અભાવ સમી વિશ્વશાંતિ ત્યાં ઝરે.)

૧૧-૧૦-’૫૯
⁠(પુનરપિ, પૃ. ૮૯-૯૦)