કાવ્ય-આચમન શ્રેણી – ન્હાનાલાલ/૪૪. મહીંડાં

૪૪. મહીંડાં

(ઢાળ : પાલવડો મ્હારો મ્હેલો, મોહનજી !
મારગડે મ્હને જાવા દિયો)

હલકે હાથે તે નાથ ! મહીડાં વ્હલોવજો.
          મહીડાંની રીત ન્હોય આવી રે લોલ.

ગોળી નન્દાશે, નાથ ! ચોળી છંટાશે, નાથ !
          મોતીડાંની માળા તૂટશે રે લોલ;

ગોળી નન્દાશે ને ગોરસ વહી જશે,
          ગોરીનાં ચીર પણ ભીંજશે રે લોલ :
          હલકે હાથે તે નાથ !

ન્હાની શી ગોરસીમાં જમનાજી ઊછળે
          એવી ન નાથ ! દોરી રાખો રે લોલ;
ન્હાની શી ગોરસીમાં અમૃત ઠારિયાં,
          હળવે ઉઘાડી નાથ ! ચાખો રે લોલ;
          હલકે હાથે તે નાથ !

(ન્હાના ન્હાના રાસ ભાગ-૨ પૃ. ૪૪)