કાવ્ય-આચમન શ્રેણી – સુરેશ દલાલ/ઘૂંટડો

૬. ઘૂંટડો

મેં તો મટુકીમાં છલકાવ્યાં મધમીઠાં નીર :
⁠તમે પીધો નહીં એકાદો ઘૂંટડો લગીર!
હું તો આશભરી આજ લગી ઊભી અધીર :
⁠તમે પીધો નહીં એકાદો ઘૂંટડો લગીર!

⁠ઝૂરે આ ગાગર ને કૂવાનો કાંઠડો :
⁠પંથે પથરાઈ ઝૂરે લીલુડો લીમડો.
છાંયડામાં શીતળ આ સળગે સમીર :
⁠તમે પીધો નહીં એકાદો ઘૂંટડો લગીર!

⁠એક જ આ વાત વસી મારે રે સોણલે :
⁠ઝીણેરી ધાર તમે ઝીલી લ્યો ખોબલે.
કૂજે મનના આ મધુવનમાં કોયલ ને કીર :
⁠તમે પીઓ જો એકાદો ઘૂંટડો લગીર!

૧૯૬૨⁠(કાવ્યસૃષ્ટિ, પૃ. ૨૧)