ગુજરાતી ગઝલસંપદા/ બાબુલાલ ચાવડા ‘આતુર’

બાબુલાલ ચાવડા ‘આતુર’

યાદનો ઘેઘૂર વડલો સાચવ્યો છે મેં હજી,
આંખમાં થોડોક વગડો સાચવ્યો છે મેં હજી.

એક ગાડાવાટ મારા કાળજામાં જાય છે,
એક જણ માટે જ રસ્તો સાચવ્યો છે મેં હજી.

રોજ બાવળના પીળાં ફૂલો ખરે છે આંગણે,
રક્તમાં આ કેમ કાંટો સાચવ્યો છે મેં હજી!

જળ અને જળના હિલોળા જ્યાં કદી થીજી ગયા,
એ સરોવરનો કિનારો સાચવ્યો છે મેં હજી.

ગામમાં ‘આતુર’ ઝૂરે છે એક ખાલી ખોરડું,
સાત પેઢીનો નિસાસો સાચવ્યો છે મેં હજી.