ગુજરાતી નારીસંપદા : કવિતા/દીવાલ

દીવાલ

ઉમા પરમાર

⯐

હું નાનપણથી એને જોતી,
બધી બાજુએ દીવાલોથી ઘેરાયેલી...
અનિચ્છા, અસંતોષ, અસંમતિ, અભાવ, અકલ્પ્ય અપાર વેદના
અને કંઈ કેટલીયે અ-જન્મી ઇચ્છાઓ સાથે એ રહેતી...
આ ‘અ’ની દીવાલો એને અકળાવતી,
એને ગૂંગળાવતી ને છતાં
એ શ્વસી રહી!
હું જોતી રહી...
મારી ઇચ્છાશક્તિ સાથે હું
મોટી થતી ગઈ ને,
તેમ-તેમ એક પછી એક એ દીવાલની ઇંટ
તોડતી ગઈ...
એની ભીતરની સ્ત્રી પણ તો આ જ ઇચ્છતી હતી
એનું એ સ્વપ્ન મેં સાકાર કર્યું,
ખુલીને શ્વાસ લેવાનું...
હવે, અમને પૂરે એવી દીવાલ નહોતી,
પેલી અકળામણ નહોતી
એ ગૂંગળામણ નહોતી
હું પણ મુક્ત થઈ અને મા પણ!

***