ગુજરાતી નારીસંપદા : કવિતા/વેળા
વેળા
ગીતા પરીખ
⯐
જાય છે વેળા, જાય છે વેળા,
જાય છે વેળા છૂટી,
પળની પાછળ પળની સાંકળ,
એક કડી તૂટી. – જાય.
રાત ને દિવસ એકબીજાની
પાછળ કરે દોડ,
લેશ ચૂકે ના તોય કદી યે
મળતાં જોડાજોડ;
એકમેકના તલસાટે પણ
ક્યાંય ન જરી ત્રુટી. – જાય.
જાય છે વેળા, આવતી કદી
પળ ન પાછી એક,
આજના ફૂલની આજ માણી લો
મન ભરીને મ્હેંક!
પળની ભીતર શાશ્વતીની
રખે મળે જડીબુટ્ટી! – જાય.
જાય છે વેળા, જાય છે વેળા,
જાય છે વેળા છૂટી,
મોકળો મેલ્યો કાળ-ખજાનો,
આવડે તો લ્યો લૂંટી! – જાય.
***