ગુજરાતી નારીસંપદા : કવિતા/સપનાનો રંગ
Jump to navigation
Jump to search
સપનાનો રંગ
ચન્દા રાવળ ‘જ્યોત’
⯐
મને સપનાનો રંગ ગયો લાગી!
એક નવલો આલાપ ગયો જાગી!
આગિયાની પાંખ ચડી અજવાળાં ઊડતાં
રજનીગંધાની ડાળ ખીલે;
રિમઝિમ પરાગમાં સૂરો શું નીતરે!
લયનો હિલ્લોલ રાત ઝીલે!
મને ગીતિનો છંદ ગયો લાગી!
એક નવલો આલાપ ગયો જાગી!
જમુનાની છોળ સંગ ઊછળતી લાગણી
પ્રીતિની ઊગતી સગાઈ;
સીકરથી ઝૂલતાં મોતીને ઝૂમખે
રાધાની અલકો ગૂંથાઈ.
મને કલ્પનનો સ્પંદ ગયો લાગી!
એક નવલો આલાપ ગયો જાગી!
***